Bible

1 非利士人㧯以色列人在基利波山相㓾。當多以色列人被人㓾死；無死个人，包含掃羅㧯佢該兜孻仔，全部逃走。 2 非利士人逐到掃羅㧯佢該兜孻仔，㓾掉約拿單、亞比拿達㧯麥基‧舒亞。 3 四周圍向掃羅个攻擊緊來緊激烈；佢被敵人个箭射到，受重傷。 4 掃羅對代佢拿武器个侍衛講：「你个刀仔挷出來，將𠊎㓾掉！恁樣，該兜無受割禮个非利士人就無法度㓾到𠊎來凌辱𠊎。」總係該侍衛非常驚，毋敢㓾；所以掃羅挷出自家个刀仔來，伏在刀仔頂高將自家刺死。 5 該侍衛一看到掃羅死掉，也伏在自家个刀仔頂高自殺。 6 恁樣，掃羅㧯佢三個孻仔全部死掉；佢个王朝也結束了。 7 耶斯列山壢个以色列人看以色列軍隊逃走，又看到掃羅㧯佢該兜孻仔也攏總戰死，就離開佢等个城逃走。非利士人就來佔領，住在該位。 8 第二日，非利士人去剝死人个戰衫；佢等發現掃羅㧯佢三個孻仔个屍體橫在基利波山， 9 就剝掉掃羅个戰衫，剁下佢个頭，解下佢个武器。佢等派人到非利士各地去，向佢等个偶像㧯人民報告這消息。 10 佢等將掃羅个武器放在佢等个一座神廟肚，將佢个頭那掛在佢等个大袞神廟肚。 11 基列境內雅比城个人民一聽到非利士人對掃羅所做个事， 12 佢等當中所有个勇士就出發，去將掃羅㧯佢該兜孻仔个屍體搶轉來，帶到雅比，將佢等个骸骨葬在雅比个一頭柳樹下，然後禁食七日。 13 掃羅死掉；因為佢對上主無忠心，無聽從上主个命令。佢求問交鬼个， 14 毋求問上主，所以上主將佢㓾掉，將王位給耶西个孻仔大衛。